مسدّس عین سویرا

رنگینئِ جہاں میں تماشا تھا روز کا
نقلی طرب کے ساز ڈرامہ تھا سوز کا

بازار اک لگا تھا گرانی کے دور میں
عشوہ گری و غمزہ طرازی فروز کا

وہ راہ گھر کی بھول کے شاید اداس تھا
گویا کتابِ غم کا کوئی اقتباس تھا

روشن خیالِ نو کا دیا دل میں تھا مگر
طوفانِ کج ادا بھی کہیں آس پاس تھا

پھر آستانِ نور کا جلوہ نکھر گیا
قرطاسِ شب پہ عین سویرا بکھر گیا

اب مل گئی یہ بزمِ چراغاں طفیلِ شیخ
بسمل دل و جگر ہوئے رخشاں طفیلِ شیخ

دْر بے بہا جو دیدۂِ تر کو تری ملے
روشن ہوئے جو طاق تھے ویراں طفیلِ شیخ

الفاظ تیری نرمئِ گفتار پر فدا
عنوانِ زندگی ترے اسرار پر فدا

بدعت کی موت ٹہری تری جنبشِ قلم
جدت تو خود ہے گرمئِ احرار پر فدا

پل میں مزاجِ یار بدل کر سنور گیا
قرطاسِ شب پہ عین سویرا بکھر گیا

لفظوں کے تبسم میں ترا ہی خیال ہے
تو ہے ترا جمال ہے تیرا جلال ہے

پتے خزاں میں سبز ہیں اس گلستان کے
لہجہ گلاب رکھنا خزاں میں کمال ہے

اپنی وفا کو اور بھی گہرائی مل گئی
یعنی ترے خلوص کی سچائی مل گئی

پرچار صدقِ دل سے صداقت کا گام گام
اب نوریوں کو قوتِ گویائی مل گئی

پیارا کلامِ شیخ جو دل میں اتر گیا
قرطاسِ شب پہ عین سویرا بکھر گیا

گل تبصرہ نگار مصنف بہار ہیں
خوشبو ہے تین شین وجاہت نکھار ہیں

کیا خوب عین نوری جو ہے کوکبِ سحر
ریکھائیں جس کی عین سویرا سنگھار ہیں

عماد کی, جنید کی, عظمٰی کی ہے لگن
بہتر سے بہترین وہ لائیں گے اب سخن

تعلیم و تربیت ہے اصل میں حیاتِ قلب
اس واسطے ہے عین سویرا مرا وطن

شاہد وہ مشکلات کا دریا اتر گیا
قرطاسِ شب پہ عین سویرا بکھر گیا